Sunday, November 06, 2005

سبعة × سبعة × سبعة


هي دعوة لاكتشاف جوانب مختفية من نفسي مكنتش بفكر فيها كتير
ميرسي يا غادة .. ربنا يخليكي لي .. بس مش هاعرف اجيب سبع أشخاص أوجه لهم الدعوة .. معلش عديها المرة دي

سبع حاجات نفسي أعملها

اتعلم السواقة
أحب شغلي الجديد
أقعد في كرسي هزاز في بلكونة عالية وواسعة
أسوق عربية بالليل على كوبري والشبابيك مفتوحة والكاسيت شغال
يبقى لي حاجات مفضلة : أكلة مفضلة أو مشروب مفضل حتى ولو كان شاى
أمسك خرطوم ميه وأقعد أروي أرض واسعة مزروعة نجيل
أفضل متمسكة بحقي في إن يكون لي حياة مختلفة شوية صغيرة بس

سبع حاجات مش بعرف أعملها

أحكم صح على الناس من الانطباعات الأولى سواء بالسلب أو الايجاب
أكون مظبوطة في مواعيدي
اتحكم في مشاعري اللي بتبان على وشي لإنها بتحرجني وبتحطني في مواقف بايخةةةةةةةةةةةةة
أصدق إن ماما هتفضل بعيدة عني بقية حياتي
أحب الشتاء أو حتى أستحمله بكل برودته وكآبته
ابطل تفاؤل شوية لإني خايفة الصدمة اللي تفوقني تبقى كبيرة عليا
أحب الفن التجريدي أو الأدب "المعاصر بزيادة" لإني مش بعرف أتذوق حاجة مش فهماها
سبع حاجات بقولها على طول
"مش عارف" وعلى طول بقولها بصيغة المذكر
" يا فندم " بس مش بقولها غير لأصحابي والناس اللي متعودة عليهم
" أنت عبيط؟ " كل ما اتضايق من حد من اخواتي
" أنتي مجنونة " بقولها لنفسي كتير ببس بيبني وبينها
" هاتصل بيكي ضروري ونتكلم كتير " بقيت بقولها لكل أصحابي تقريبا بس غالبا ده مابيحصلش
" سيبها على ربنا " كل ما اقابل أو حد يقوللي على مشكلة
" المصرية للاتصالات .. ماريان فكري .. صباح / مساء الخير " بقولها كل دقيقة لمدة 8 ساعات يوميا في الشغل

5 comments:

محمد هشام عبيه said...

يافندم ربنا يسهلك طريقك ويرزقك بابن الحلال اللي تحققي معاه كل سبعاتك ..أو بدونه مش فارقة قوي يعني!
بس ياريت تخليك متفاءلة زي ما أنت..دي حاجة صعب تكون موجودة أصلا عند ناس كتير اليومين دول..تبتي في التفاءل ده بإيدك واسنانك...وخليك بعيد عن الفن التجريدي والأدب المتجرد من كل حاجة..عشان تحتفظي بروحك الحلوة..خاصة أن كل العباقرة كانوا زيك كده مش بيطقوا التجريدي ده..وأولهم أنا طبعا!د
بص وطل ..محمد هشام ..صباح/ مساء الخير!د

tandyflynn7096 said...

I read over your blog, and i found it inquisitive, you may find My Blog interesting. So please Click Here To Read My Blog

http://pennystockinvestment.blogspot.com

Hend Nour said...

يا حظ المصرية للأتصالات الحلووووو ،ويا حظ بص وطل واللي فيها الزفت.....
وحشتينا قوووووووووووووووووووووووي يا ماريان...

Anonymous said...

Nice ..
You maybe intrested in adding your blog to the new egyptian bloggers community .. at: http://www.egybloggers.org

Thanks.

حازم ربيع said...

يا سبعاتك يا سبعاوى
اجابات حلوة
صريحة
ذكية
خفيفة الدم
ومعبرة
باتمنى
تحققى كل السبعات اللى فى الدنيا
وخصوصا البلكونة الواسعة والكرسي الهزاز
--------------------------------
مدونتك لذيذة
مافيهاش دوشة كتير
اسمحيلى
اكون صديقك لمدونتك
-----------------------------
وباقدم ليكى الدعوة لزيارة مدونتى المتواضعة
مدونة روح الفدا