Tuesday, June 07, 2005

فوضى مشاعر

ماشية الدنيا ماشية .. ساعة تهدي وساعة تعدي .. طب رايحة فين؟! والله ما انا عارفة .. ده انا حتى مش شايفة .. لكن المهم إن كله بيعدي .. طب ليه بتسلمي .. وتسكتي .. اتكلمي .. قومي وانطقي .. ده حقك .. ليه فيه بتفرطي
أكيد الكون ده لسه فيه حد .. ممكن يمد إيده ويشد .. حد بيسند ويقوي الظهر.. يحمي من القهر

قهر ؟؟!! هو أنتي مقهورة ؟؟
لأ طبعا .. يمكن بس معذورة .. تحسي بالاحتياج للإيد اللي بتطبطب .. لكن ما تنكريش إنك كتير بتلاقيها .. لما بتحتاجيها .. وكمان ما تنكريش إنك كتير بتبقي سعيدة .. أيوة سعيدة .. وبترجعي تحلمي .. وتضحكي .. وتتبسمي .. وتقولي بكرة هاكون .. وعشان بكرة .. كله يهون .. يا ترى يا بكرة .. هتيجي بكرة! .. ولا هي فكرة وانكتبت ع الورق المجنون

هو الورق مجنون ؟؟
والله ما مجنون غيرك .. كل ساعة بحالة واهي دوامة .. وخداكي في بحر عميق .. طول عمرك بتخافي منه .. بتخافي تبقي انتي الغريق .. اخرجي من البحر ده .. اهربي .. ليه تتعذبي .. وطيري في السما اللي أنتي بتحبيها
ولحضنك ضميها .. واوعي تسيبيها .. دي فرصة عمرك .. اللي لازم تاخديها

11 comments:

nanosa said...

أولا ألف مبروك .. وعقبال ما توالينا بالكتابات ..

ثانيا .. كتابتك حلوة أوي وبجد من القلب وتمس القلب..

ثالثا بقي.. لازم تلاقي الإيد اللي بتطبطب لأنك أول حد بيقدمها لكل الناس..
ده غير انك بجد حد جميل أوي ومؤثر أوي وكله مشاعر وأحاسيس وطيب أوي.. وأنا بعتبر نفسي محظوظة بجد إني قابلت ملاك زيك في حياتي..
وبقولك لازم تنتهزي الفرصة وتخديها لأنك أكيد تستحقيها

Ghada said...

احم .. نانسي سبقتني وقالت الكلام اللي أنا كنت عاوزة أقوله..هايل!

لا مانع من الإعادة ..
يا ميرو إنتي بني آدم جميل .. ووجودك في الدنيا دي من أجمل الحاجات اللي حصلت لي في حياتي..
على قد ما إنت حد حساس ورقيق، على قد ما إنتي حد قوي وطموح وعاقل.. نفسي في يوم من الأيام أحقق معادلتك
دي يا ميرو

--
علىى جنب: فاكرة الحاجات اللي كنت باقراهالك أيام الكلية .. فاكره دي

That despite being pushed under,
I never …. Surrender.
And if I can’t fight back
I can always …Shout louder.
;)
(جت في بالي وأنا بقرالك)

خليكي زي ما إنت .. من حقك إنك تكوني حد مبسوط
:)

أحمد عمار said...

صباحه فل إن شاء الله.. طبعا يا باشا إنت عارف أنا عايز أقول إيه، وطبعا مفيش داعي أقوله عشان الفضايح واحنا ع النت وكده.. المهم مبروك يا سيدي على افتتاح صفحتكم العامرة وإن شاء الله حضرتك تغرقينا بكتابات أشكال وألوان، وسلام بقى..

محمد هشام عبيه said...

مين قال أن دي فوضى مشاعر..ياباشا دي المشاعر نفسها..
تعرفي الشعور اللي بيجي للواحد مننا لما يقرأ حاجة ويحس أنه كان نفسه يكتب نفس الكلام ده بس مش قادر ..أهه هو ده شعوري دلوقتي ..وإمبارح"لما قرأت ماكتبتي لأول مرة"
على رأي خالتي نانسي وصديقي أسامة منير! اللي بيطلع من القلب بيوصل للقلب ..وده سر حب الناس ليك يبقى مش هيحبوا يقرأوا ليكي ؟
استمر ياباشا..ودع الكسل-في الكتابة- وأبدأالحياة..ومتفرطتيش في مشاعرك الحلوة والرقيقة دي حتى لو كانت في رأيك أنت بس مجرد فوضى..

Eman said...

لو بتعتبريها فوضى يبقى عايزاكي فوضوية علطول ده بمنتهى البساطة انتي يا دوبل ماري آه نسيت أقولك حاجة يا ماريان أنا دايما باناديك دوبل ماري أو لما اهزر بقولك اتنين ميري وانت مسألتينيش ولا مرة ليه يمكن علشان عارفة أو علشان مش واخدة بالك من الكلمة بس بجد يا ماريان انتي اتين هادية وشقية حادة وعاطفية حنينة وجامدة نار ونور م الأخر يعني يمكن علشان كده فوضة مشاعرك ديه وصلانا كلنا انتي يا ماريان م الأخر بني أدماية جميلة جدا ورقيقة جدا بس مش ضعيفة ولا طرية لأ جامدة وعارفة انتي عايزة تعملي إيه بجد يلا خلتونا ع الصبح نقول كلمتين كويسين في حقك منك لله
باهزر طبعا

meero said...

نانسي : أولا الله يبارك فيكي .. ثانيا مبسوطة اوي ان الكتابة بجد مست قلبك .. ثالثا ميرسي كبييييييييرة اوي على كل الكلام الحلو اوي ده واللي أشك إنه عن حد تاني .. لكن اوعدك اني هحاول بجد اخد الفرصة .. بس هي تيجي

غدغود : لو فيه معادلة موجودة في حياتي "لو" فأنتي من اول الناس اللي بيساعدوني على تحقيقها

أستاذ أحمد : صباح الفل .. ايوة عارفة وخليها كده في سرك أحسن .. الله يبارك فيك بس ما تأملش قوي في الحاجات الأشكال وألوان دي

محمد هشام : لو بجد بجد انا قلت كلام كان ممكن أنت تقوله يبقى أنا كاتبة مافيش مني .. نفسي اوعدك إني اهتم بالكتابة أكتر لكن مش عارفة ليه مش قادرة أقولها لكن أكيد أكيد مش هفرط في مشاعري .. ابدا

إيمي : تصدقي عمري ما فكرت فيها كده .. أنا كده هبتدي اخاف على نفسي من الشيزوفرينيا .. بس ميرسي على الكلمتين الكويسين قوي دول

كلمة أخيرة ليكم كلكم : في ساعات كتير بلاقي ايديكم بجد بتطبطب عليَ .. وبعتبر نفسي محظوظة فعلا إن ليَ أصحاب زيكم .. ربنا يخليكم ليَ

Omar said...

البنت البنوتة
مفكوكة ومربوطة
مهما تكون زعلانة
قادرة تكون مبسوطة

البنت اللي ما بانت
واتدارت في عنيها
جوة غناوي فرَحها
قادرة تكون زغروطة
يالبنت البنوتة

Doaa Samir said...

تقريبا أنا هاعمل بلوج وأسميه آخر المدعوين،
مبروك يا ميرو ع البلوج اللي قرأت اسمه قبل كده أيام العز "الشات" ووقفت عنده مع إني ما علقتش لأنه مليان فوضى محببة لي.. كفاية نقول فوضى مشاعر ونسكت واللي يجي في البال يجي في البال من غير حدود.
مش عارفة أقول لك ايه لأن كل المدعوين سبقوني وقالوا كل اللي ممكن يقال.. بس فيه حاجة محمد هشام قالها وعمالة تلح عليّ فاهقولها ومش تأثرا بيك يا محمد ولا حاجة- بجد اللي كتبتيه يا ميرو هو اللي مغرقني من فترة طويلة قد تكون قصيرة زمنياً لكنها طويلة وبطيئة ضمنياً وحقيقياً (عندي).. بس كده

meero said...

عمر شاعرنا الكبير: متشكرة اوي اوي على الكلام الحلو ده .. ولو أنا صحيح مش باينة فأنا بحاول أجرب طرق أخرى للظهور

دعاء: الله يبارك فيكي .. مش آخر المدعوين ولا حاجة بس يوميها أنتي كنتي غايبة .. عجبني وصفك للفوضى بإنها "محببة" لإنها فعلا كده والغرق فيها مش دايما بيبقى وحش

Hend Nour said...

انهاردة 13 مارس....د
تعرفي انا قريت فوضة مشاعرك كام مرة؟؟؟ هسيبك تخمني واحسبيها من 7 يونيو 2005 لـ 13 مارس 2006 لحد ما قدرت أكتب تعليق!!! كتيييير سألت نفسي ليه مش قادرة اكتب تعليق مع إني عايزة اكتب قوووووي.. وانهاردة بس عرفت والسبب ببساطة اني كنت ماسكة مراية في إيدي بالصدفة وشفت الكلام اللي نفسي اكتبة عبارة عن رد فعل على وشي... او بمعني اصح مجموعة تعابير مع بعض واتأكدت ان عمري حتي مهعرف اكتبهم او احاول اشرحهم لأنهم صاحين ولهم قيمة طول ما هما على وشي لو اتكتبوا او اتفسروا هيموتوا وانا عايزاهم معايا دايماً... اللي انت بتقولي عليه فوضي مشاعر هو الحتة السرية اللي موجودة عند كل واحد فينا كلنا عملنا الحوار ده مع نفسنا وكنا متصورين اننا اصحاب الملكية الفكرية للحوار ده لكنك جيتي ببساطة وقلتي لنا لأ ...بس خلاص

mohamed shahin said...

فوضى المشاعر اسم له احسااااااااااااس جامد جدا بيوحى بحاجات ......ايوه هى دى حاجات الواحد ميعرفش يعبر عنها اطلاقا بس جميل اللى انتى كتبتيه عن فوضى مشاعر يسلمووووووو