طول عمري بحلم أكون فنان
امسك الفرشاة
واخط ع الورقة البيضا
احلام عريضة
احلام بعرض الحياة
وبطول الزمان
واللعبة حلوة
واللون يجر لون
والوقت بيعدي بجنون
وأنا الفنان
عمال اركب في الألوان
شوية احمر غضبان
وشوية اصفر غيران
وشوية اسود هنا كمان
واتلخبطت الالوان
وقعت ع اللوحة بلا حسبان
وضاعت ملامح الصورة
وتاه معاها الانسان
ده غير كمان بقعة عنيدة
اتشربت من كل لون كان
لو ترجع اللوحة بيضا !!!
لو بس المسح كان في الامكان!!!
لكن خلاص
اللوحة أصبحت في خبر كان
*****
وفي عز اليأس والأحزان
ظهرت ايد فنان
فنان عظيم
مبدع الفلك والأكوان
وبنظرة واحدة
عرف حل المسألة
لكن كان لسه فيه مشكلة
الفرشاة لسه في ايديا
واحساس الألم والفشل مالي عينيا
لكن عينيه ثبتت عليا
وكأنها لحظة استئذان
مني أنا الغرقان
صرخت وقلت محتاجلك
نجني من الضياع ومن الهوان
وبدأ الفنان
يظبط الالوان
وبدأت الصورة تبان
حتى البقعة العنيدة
وبطريقته الأكيدة
صارت قوس قزح
وصارت بهجة وفرح
وظهر كمان
قلب الانسان
قلب أبيض ناصع
تمام زي قلب الحنّان
